Davao City – Hataas nga panahon pa ang gikinahanglan una pa makasulti ang katawhan nga nakab-ot na gayud ang hustisya diha sa kamatayon sa 15 ka mga biktima ug ang ubay-ubay nga mga na-angol sa Roxas Night Market bombing mag-usaka tuig na ang nakalabay.
Kini maoy nilutaw karon nga assessment sa mga radio listeners kinsa nitampo sa ilang opinyon sa morning radio social commentary program nga ‘RMN Straight to the Point’ sa topiko nga ‘Roxas Bombing Revisited.’
Daghan ang nanawagan nga paspasan sa mga awtoridad ang imbestigasyon labaw na ang prosekusyon sa mga tawong unang arestado human sa dugoong insidenteng gibasol ngadto sa terorista ug bandidong grupong Maute sa Marawi.
Sa phone interview, gisugilon ni resource person Dr. Adrian Tamayo sa Institute of Popular Opinion (IPO) sa University of Mindanao nga usa ka leksyon sa maong hitabo mao nga walay si bisan kinsa kanato exempted kun luwas sa pagpang-atake sa mga grupong nag-promotar ug kaguliyang ug kasamok.
‘Active citizenship’ maoy labaw’ng gikinahanglan nato karon, segun kang Tamayo kinsa namahayag nga pruweba sa importansya niini mao nga napugngan ang ikaduhang bombang gitagana unta alang sa Davao City sa dihang na-diffuse ang eksplosibo didto sa Tacurong, Sultan Kudarat una pa mahidangat dinhi.
Sa pikas bahin, pipila ka mga paryente sa mga biktima sa Septiyembre 2, 2016 nga pagbusikad mapasalamaton sa tabang sa gobyerno ngadto kanila uban sa pasalig nga padayon sila sa pag-move on bisan pa man sa tumang kasakit ug kamingaw hatud sa nasangpit nga ‘traumatic experience’ nga nitugaw sa kalinaw dinhi sa habagatan.
Karong Agosto 31, usaka santos nga misa ipahigayon mismo sa Ground Zero sa explosion nga mao ang Roxas Night Market diin mismong si Mayor Inday Sara Duterte-Carpio maoy mangulo sa maong mapait nga komemorasyon.
Kasamang June Duterte
