Sa pagbukas sang pila ka resort sa Negros, health protocols sa gihapon gina-istrikto

22

Matapos ang pila ka bulan nga pagsira kag temporaryo nga pag-untat sang operasyon bangud sang pandemic tuga sang COVID-19, ginpahanugutan na gid man ang pagbukas kag pabalik operasyon sang mga resorts sa pila ka bahin sang Negros Occidental.

Sa listahan nga ginpagwa sang Negros Occidental Provincial Tourism Office, pila sa kilala nga mga tourist destination nga nagbalik na operasyon amo ang Campuestohan Mountain Resort kag Nature’s Village sa Talisay City.


Handa naman nga magbukas ang kilala nga island resort sa Cadiz City, ang isa ka tourist destination sa Silay City kag posible magasugod naman baton sang turista ang ciudad sang Sipalay sa masunod nga bulan.

Samtang sa bahin sang ginakabig summer capital of Negros Occidental, ang banwa sang Don Salvador Benedicto, bukas naman ang mga establishments diri partikular ang mga kapehan.

Nakaandan na nga padulungan ang mga kapehan sa DSB bangud wala labot sa manamit nga kape, preska pa ang hangin nga mahaklo may paaman pa nga panoramic view.

Reminder lang sang pamunuan sang tagsa ka LGU nga natungdan, kon maglagaw indi pagkalimtan ang padayon nga paghalong kag pagtuman sang health protocols kaangay sang pagsuksok sang face mask kag face shield, pag-sanitize kag physical distancing.




[image: image.png]

Facebook Comments