Gipasakaan na og kasong murder kagahapong adlawa ang sakop sa Philippine Air Force nga nakapusil patay sa iyang kauban niadtong Biyernes sa gabie sa Philippine Air force-Tactical Operations Group headquarters sa Barangay Lumbia ning syudad sa Cagayan de Oro.
Kini ang gibutyag ni SPO2 Elmar Patindol, imbestigador sa Lumbia Police Station sa interview sa dxCC-RMN.
Matud ni Patindol nga gipasakaan na og kasong murder si Airman Second Class Reymart Noquera tungod sa pagpusil patay kang Staff Sergeant Renante Blanco.
Nagsilbing complainant sa kaso ang asawa sa biktima nga si Airene Blanco nga taga Angeles City, Pampanga.
Gidugang ni SPO2 Patindol nga gibutyag sa suspek nga gihulga matud pa siya sa biktima nga patyon sa wala pa nahitabo ang shooting incident.
Sa karon naa pa sa kustodiya sa 4th Infantry Division, Philippine Army ang suspek.
