Gipahinungdan sa Department of Education – Malaybalay City Division ang sakripisyo sa mga magtutudlo dungan sa kasaulugan sa World Teachers Day karong adlawa Oktubre 5.
Sa interview sa RMN Malaybalay ngadto kang Assistant Schools Division Superintendent Sunny Ray Amit gibutyag niini nga ilang gipasalamatan ang sakrapisyo sa mga magtutudlo sa pag-alagad ug pagmatuto sa mga kabataan nga gikonsiderang ikaduhang ginikanan.
Matud ni Amit nga bisan pa man sa mga isyu ug batikos nga na-angkon sa pipila ka mga magtutudlo apan nagpabilin pa gihapong lig-on sa pagtuman sa ilang mandato nga mao ang paghatag ug katumanan sa pangandoy sa mga ginikanan nga mahimong maayong lungsuranon ugma damlag ang ilang mga anak.
Nanghinaut usab si Amit nga taliwala sa mga suliran nga ma-angkon sa mga magtutudlo, kinahanglang magpabilin magmalig-on sa pagserbisyo ug dili malimtan ang dakong papel diha sa katilingban.
Nasayran nga subay sa Republic Act No. 10743 nga nag-uluhan nga An Act Declaring 5th Day of October of Every year isip National Teachers’ Day ug World Teachers’ Day every 5th of October nga gideklara sa United Nations Education and Cultural Organizations (UNESCO).
