Midsalip, Zamboanga del Sur – Pito ang samaran og tulo niini ang kritikal human madisgrasya ang gisakyan niining motorsiklo sa Brgy. Sigapud, Midsalip ning probinsya sa Zamboanga del Sur alas 4:00 niadtong huwebes sa hapon.
Giila ang mga biktima nga sila si Rebon Andio, 10-anyos, Aljane Macutulag, 15-anyos ug Sergio Gimena samtang nakaangkon usab ug daghan samad bun-og ug samad sa lawas sila si Anthena Enomo 3-anyos, Antonio Enomo-29 anyos ug Wilmar Andrin,16-anyos.
Sa inisyal nga imbestigasyon nasayran nga nagpagaling og humay sa Brgy. Canipay Sur ang mga biktima og samtang gahulat nga mahuman pagaling ang humay ni-inom una sa ilimnon nga makahubog ang drayber nga si Antonio Enomo og dihang nipauli na ang sakyanan karga ang mga pasahero kalit nga nawad-an og kontrol ang drayber pag-abot sa kurbada nga bahin og naligid sa kilid sa kalsada.
Naipit ang mga pasahero ug ang uban nangahagbong hinungdan sa pagkahiagom niini sa samad ug bun-og sa lain-laing parte sa lawas.
Diha-diha nahaw-as ang mga biktima pinaagi sa tabang sa mga residente sa maong dapit og dali kini nga gidala sa balay tambalanan sanglit grabe ang samad sa uban nga pasahero gibalhin kini sa syudad sa Ozamis.
Subli nga nagpahimangno ang otoridad nga likayan ang pag-inom sa ilimnon nga makahubog kun dunay byahe aron makalikay sa disgrasya.
