General Santos City—usa patay, usa samdan sa nahitabong pagkahagbong sa usa ka sakyanan sa bangin sa national Highway, Prk. 15, Barangay Tinagakan, Gensan.
Biktimang namatay nailang si Geremias Delamente, 54, government driver, residenti sa Ladol, Alabel, Sarangani Province. Samtang ang angol nailhang si Noel Giani, 50, Empelyado sa DILG-Alabel ug residenti sa samang lugar.
Alas 6:10 ang takna sa gabie dihang nahitabo ang disgrasya sa kadalanan human nga gilikayan sa mga nahisgutan ang mitabok nga motorsiklo hinungdan nga sila nahagbong sa bangin nga dunay gitas-on nga 10ft.
Sa inisyal nga imbistigasyon sa mga personahe sa Traffic Management Unit pinaagi ni Po2 Lemuel Avis, nasuta nga gikan ug Kidapawan City ang duha ka mga biktima ug pauli na unta sa Alabel sakay sa usa ka Government Vehicle nga Mitsubishi Adventure nga sakyanan.
Apan pag abot sa maong lugar, wala mabantayan sa driver nga dunay Road Construction, kalit usab nga may motorsiklong mitabok ug ilang gilikayan hinungdan nga sila nahagbong.
Nakaangkon ug grabeng samad sa lawas ang driver samtang nakaangkon usab ug samad, bun-og ug pangus si Giani kansa nagpaalim pa karon sa iyang mga samad sa St. Elizabeth Hospital.
