Ya confirma si City Fire Marshall, Atty. Jufel Brananola que slavao todol 14 maga persona ta composite crew, pasahero y maga bata del M/L NS Express masquin ya sostene estos quemadura na destos cuerpo cuando ya arde el mencionao lancha mientras pudiao pa na diutay pantalan na Baliwasan enantes aga.
Asegun con el official del bumbero ya puede ya sila encontra con todol persona y ya lleva ya na hospital para dale tratamiento medical.
Serca man alas 9 del aga cuando ya puede ya lang oyi suena explosion ta sale adentro del lancha y ya segunda con este el grueso umera y fuego donde cada-y-cual del 14 adentro del lancha ya salta na agua para salva diila cuerpo.
Pero mayoria destos el tiene ya quemadura na cuerpo pero ya salva estos.
El lancha ta biaja para na Siasi Sulu ta carga monton barril de gasoline, maga LPG tanque y dos otro barril de crudo ta espera ya lang el hora para larga biaje para na Siasi cuando ya sosede el incidente.
Asegun on el bumbero nohay permiso desde canila el lancha para carga gasolina.
