Davao City – Nagtoo ang kapulisan sa Island Garden City of Samal (IGaCoS) igo lang gidagsa sa kabaybayunan sa maong isla ang giingong mga chop chop body parts sa tawo nga gituhuang gipatay sa laing lugar ug gilabay sa dagat.
Sumala ni PO1 John Rey Dalaygon, imbestigador sa IGACOS PNP, ikatulo na kini nga higayon nga adunay gidagsa nga chop chop body parts sa baybayon sa Barangay Catagman sa maong isla.
Gnai, niadtong nakalabay’ng semana, iya sa wala mailhing lalaki ang napalgan sa mga awtoridad.
Matud ni Dalaygon nga sa ilang gihimong pagsusi sa katawhan sa maong lugar, walay nakaila niini ug wala puy mireklamo sa ilang buhatan nga dunay nawad-an ug sakop sa pamilya.
Kahinumduman nga niadtong bulan sa Hulyo ning tuiga, tunga sa lawas nga dunay duha ka tiil ang nakit-an. Ang wala nga tiil tibuok pa, samtang ang tuo putol gikan sa tuhod paingon sa lapa-lapa nga nakit-an sa baybayon sa Purok 1-A Barangay Limao.
Human sa usa ka oras, lain na usab nga putol sa tiil gikan tuhod hangtod lapa-lapa ang nakit-ang naglutaw-lutaw sa baybayon sa Purok 1-B sa mao gihapon nga barangay.
Hangtod karon wala pa silay lead kabahin niining misteryosong pagpamatay ug kinsa usab ang mga suspetsado niining mabangis nga matang sa krimen.
RadyoMaN Bernard Pantallon
