Manila, Philippines – Iniharap sa media ng National Bureau of Investigation (NBI) ang sampung katao na aktong nagbebenta ng apat na taklobo o giant clam pearls sa may T.M. Kalaw St. Ermita, Maynila.
Nahaharap sa kasong paglabag sa Philippine Fisheries Code of 1998 na inamiyendahan bilang RA 10654, ang mga suspek na sina Jonathan Aceres, Victor Aceres, Gerardo Cerezo, Manuel Tempra, Norberto Enverzo, Jesusalora Oliva-alyas Nora, Vincent Tanggara-alyas Roy, Dixie Marie Madridano, Natranillo Lariosa at Nonito Grandia.
Ayon kay Atty. Eric Nuqui, hepe ng NBI Environmental Crimes Division, nakakuha sila ng impormasyon noon pang Disyembre 19, 2016 na may grupo nagbebenta ng ‘‘taklobo’’ na ikinukunsiderang ‘‘endangered species.’’
Aniya, ibinebenta ng mga suspek ang mga taklobo sa halos P100 milyon.
Depensa ng isa sa mga suspek, napag-utusan lang silang bantayan ang mga taklobo para sa pagbebenta nito.
Ite-turn over ng NBI sa Department of Environment and Natural Resources (DENR) ang mga nakumpiskang giant pearls.
