Davao City – Gisaway karon sa Sentro ng mga Nagkakaisa at Progresibong Manggagawa (SNPM) ang kalangay sa lihuk sa gobyerno diha sa pagtunol og hinanaling ayuda sa minilyon ka mga naggilaid nga katawhang Pilipino kinsa naapektohan og maayo ning pandemic nga miigo sa daghang kanasuran sa entero kalibutan.
Sa interview sa social commentary program nga ‘Straight to the Point,’ gibatikos ni Sentro Secretary-General Joshua Mata ang kagamhanan gumikan dili paigo ang hinabang nga gihatag ug kulang kaayo kini aron makalatas ang katawhan gikan sa krisis sa makamatay nga kagaw.
Dismayado usab si Mata sa gihimo sa gobyerno nga gipaantos pa og pal inya og taas ang mga tawo nga mabulad pa gyud og udtong tutok aron lamang ilang makuha ang katiting nga ayuda.
Gikwestion ni Mata ang pagka-gastador sa administrasyong Duterte sa nakalabay’ng mga katuigan apan karon nagdinaginot og pagpagula og kwarta luyo sa krisis nga giatubang sa nasud ug sa katawhan.
Gisugyot ni Mata ang usa ka ‘universal approach’ diha sa paghatod og ayuda aron walay ni bisan usa ka Pilipinong ma-demoralize or magutman ug nga ang tanan makalabang gayod ning pandemic nga mihampak og maayo sa tibuok kalibutan karon.
RadyoMaN Joel Viray
