Davao City – Giklaro ni Davao City Mayor Sara Duterte-Carpio nga magpabilin ang gipatumang oras sa curfew nga 7pm hangtud 5am subay sa Executive Order (EO) No.55 Series of 2020 sa City Government of Davao.
Kini luyo sa hangyo sa kadaghanan nga himuong alas 9:00 sa gabii ang pagsugod sa curfew diin sayo ra kaayo matud pa ang alas 7:00 sa gabii alang sa pag-uli sa mga trabahante o bisan sa operasyon sa mga negosyante.
Gipasabot sa alkalde nga kinahanglan ipabilin ang 7pm-5am curfew subay usab sa rekomendasyon sa mga health experts labi na nga nagbaton karon ang syudad og kapin 500 ka mga active cases sa Coronavirus Disease 2019 (COVID-19).
“Dunay mga nag-request for consideration sa oras (sa curfew) but sa pagkakaron, in agreement ang tanan nato’ng mga ginapangutana na mga doktor nga 7pm to 5am (ang curfew),” tataw sa Mayor.
Gibutyag ni Duterte-Carpio nga ugaling mo-ubos ang kaso sa COVID-19 sa dakbayan diin target nga mahimo kining 2 digits, pwede na nga magbaton og adjustment sa lihok sa katawhan.
RadyoMaN Kirby Manzon
