Tumang kalipay ug wala damha ni Ginang Emelcita Guc-ong, taga-Barangay Gumasa, Glan, Sarangani Province, nga makadawat kinig pasidungog kagahapong adlawa, adlaw nga Martes, atol sa paghuman sa duha (2) ka adlaw nga pagpahigayon sa labing una nga Provincial BNS kon Barangay Nutrition Scholars Congress sa tibuok Sarangani Province.
Si Ginang Emelcita ang nagpangidaron og saysentay-nuybe anyos (69), ug sya karon ang adunay labing taas nga panahon nga nanerbisyo isip BNS entiro Sarangani tungod kay nangalagad sya sa ilang barangay sa Gumasa, Glan sulod na sa trayntay-syete (37) ka tuig.
Mismong si Governor Steve Chiongbian Solon kauban sila Vice Governor Elmer De Peralta ug Provincial Health Officer Doctor Arvin Alejandro ang nagtunol ngadto kaniya sa pasidungog, may pakapin pa kining cash-pahalipay ug usa ka electronic gadget manghud sa laptop gitawag nga tablet. Daghan pa ang nakadawat og award kagahapon.
Walay laing nalitok nga pulong si Governor Solon kundili pasalamatan ang tanang BNS tungod kay sa ilang pagkugi, niubos ang malnutrisyon sa Sarangani Province. Malnutrisyon either kulang sa timbang o nisobra ang timbang sa bata. Ang mga BNS ang gapanguna sa pagpahigayon og operation timbang ug mga feeding program bisan sa mga lagyong kabukiran masiguro lang nga ang mga kabataan ang adunay saktong nutrisyon ug makadawat og dungag bitamina gikan sa Department of Health ug mga partner health organizations.
Matag tuig ginapahigayon sa Sarangani ang BHW kon Barangay Health Workers Congress, apan karong tuiga gitutukan usab ang panagtigum sa tanang barangay nutrition scholars. Nakatutok ang mga BNS sa nutrisyon maong ang ilang accomplishment matag adlaw ang ila kining ginapasa sa midwife ug sa municipal health office padulong sa provincial nutrition action office agi sa Maternal, Newborn, Child Health and Nutrition/MNCHN Coordinator Razel Bustria.
Samtang, ang mga BHW ang nagahatag og report sa ilang mga kalihukan direkta sa Kapitolyo pinaagi sa programa nga BHERT(be-hert) kon Barangay Health Emergency and Resiliency Team kung diin sila ang frontliner sa pagpatuman sa health services lakip na ang emergency-disaster responses.
Pirti na lamang ang pamalakpak sa mga BNS kagahapon human gi-anunsyo ni Governor Solon nga umentuhan ang ilang honorarium, gawas pa sa madawat nila matag bulan gikan sa ilang mayor og barangay kapitan. Kana tungod matud pa sa paglihok ni Board Member Irish Arnado-Benola, ang chairman sa Sangguniang Panlalawigan Committee on Health ug sa mga kaubanang board member, sa pagsuporta nila Senador Manny ug Congressman Ruel Pacquiao.
Gawas sa dungag sa ilang monthly allowance, may ginahan-ay pud karon sila Governor Solon ug Vice Governor De Peralta nga performance-based incentive, insentibo alang sa mga BNS kung diin makadawat og mga pahalipay ang kadtong makapakita og maayong performance matag tuig.
Sunod-sunod karon ang mga kalihukan sa maayong panglawas sa Sarangani Province. Karong adlawa, Miyerkules, Septembre 11, mao na ang Anti-Dengue Reload Campaign, magsugod unyang hapon alas kwatro (4pm) ang pagpanglimpyo entiro Sarangani.
