Davao City – Pagpasaylo, sagad kanato mag ingon nga kini nga pulong sayon lamang paminawon apan lisod buhaton labi na kon nagbilin og dakong samad sa imong kasing-kasing ang gibuhat ngadto kanimo.
‘Tamnan og kawayan’? dumtan hangtod sa hangtod o sulod sa taas kaayong panahon? Kini nga pulong ang akong madunggan sa mga tawong muingon nga di na gyud sila makapasaylo.
Niay istorya sa usa ka asawa nga mihatag og tsansa ug nakapasaylo sa iyang bana bisan pa man kon gitawag nga usa ka ‘urom’ ang iyang kinabuhi gumikan sa kasakit nga iyang nasinatian sa iyang kapikas.
Si alyas Rosana, 53 anyos nga taga Toril ning syudad ug usa ka battered wife kaniadto nga karon nakaangkon na og kalinaw sa iyang kasing-kasing sa dihang nakaantigo siya sa paghatag og pagpasaylo.
Duha ka tuig na ang milabay sa dihang nakadesisyon kini nga ipabilanggo ang iyang bana gumikan sa pagpangulata ngadto kaniya apan ang ilang walo ka mga anak ang nahimong tulay nga sila mag-uli.
“Akong mga anak ato naghangyo kay pagawson kay pasayluon nalang daw. Mag usab naman daw ilang papa. Ako giingnan basin buhaton nasab niya ang iyang gibuhat nako sa una nga iya kong kulatahon… Kung mag-inom siya lain ang iyang utok,” segun ni Susan.
Sa dihang mihilak ang iyang mga anak ngadto kang Rosana ug gihangyo kini nga i-dismiss ang kaso, nakahinuklog kini nga pasayluon ang iyang bana.
“Ako siyang gipasaylo. Pag abot didto, nigakos siya sa akoa ana siya pasayloa na lagi ko. Ana ko gipasaylo man taka pero mag bag-o na gyud ka, imong ipakita,” saysay pa ni Rosana.
Niadtong December 2019 lamang, nakagawas ang iyang bana gikan sa Davao City Jail ug pila na ka bulan ang milabay, nakita ni Rosana ug sa ilang mga anak ang kabag-uhan sa iyang bana.
“Karon di na siya muinom. Maayo na siya di na siya muinom, pag sweldo niya, ihatag niya sakoa. Mamalengke mi kaming duha, magsimba mi kada Domingo… Mura siyag PSL sa sulod (kulungan) didto niya nahuna-hunaan nga dili maayo ang gibuhat,” batbat ni Rosana.
Aduna usay tambag si Rosana ngadto sa mga magtiayon nga nakasinati usab og mga pagsulay sa ilang panag-uban.
“Kanang mga asawa nga madinumtanon sa iyang bana, i-ampo lang gyud na sa Ginoo kay mag usab gyud na. Nag ampo ko nga mausab siya, muundang siya og inom, natuman akong ginaampo,” tambag ni Rosana.
Alang kay Rosana, importante ang pagpasaylo bisan pa man sa kadako sa nabuhat nga sala sa usa ka tawo ngadto kanimo.
“Makapasaylo man gani ang Ginoo kita pa. Kapasaylo man gani si Jesus sa ato, Siya man gani nag antos sa atong mga sala, ako pa kaha nga di mupasaylo,” dugang ni Rosana.
Kung kamo ang pangutan-on ug kung kamo ang anaa sa sitwasyon ni Rosana, makapasaylo ba mo?
Lahi-lahi kita og naagian sa kinabuhi apan alang kanako, dili angay ihikaw ang pagpasaylo basin makaingon nalang ta og uwahi na gyud ang pagmahay.
Samtang duna pay panahon, atong ipaubos ang atong kaugalingon ug atong isigkatawo pasayluon.
Ang Ginoo gani nakapasaylo, kita pa kaha nga tawo? Ingon sa bibliya, sa Colossians 3:13, forgive as the Lord forgave you.
RadyoMaN Renz Barbarona
