Sarangani Province–Nakahan-ay na ang security plan sa kapulisan og kasundaluhan alang sa ika-26 nga foundation anniversary og ika-16 nga MunaTo Festival sa Sarangani Province nga opisyal magsugod karon nang adlaw nga Miyerkules, Nobyembre 28.
Segun ni Police Superintendent Edgar Yago, ang chief of operations and plans sa Sarangani Provincial Police Office og maoy assistant ground commander, karon pa lang adlawa, Lunes, aduna na matud pay deployment sa ilang mga tauhan tungod kay sa dili pa man pormal magsugod ang MunaTo Festival 2018, may duha (2) na ka aktibidad ang unang magsugod. Ugmang adlawa, Martes, magsugod ang Provincial Boy Scouts Jamboree og ang Sarangani Week of Peace.
Gawas ni OPAPP kon Office of the Presidential Adviser on the Peace Process Secretary Jess Dureza nga mutambong sa Week of Peace, kuyog niini ang giila nga “Goodwill Ambassador for Peace” ang artista nga si Mr. Robin Padilla, og sila Senador Manny “Pacman” Pacquiao, Senadora Nancy Binay, og former DENR Secretary Gina Lopez, gilauman usab ang pagbisita sa Sarangani Province sa sinaligan ni Pangulong Rodrigo Duterte nga si Special Assistant to the President Secretary Bong Go atol sa programang The Platform nga pagadumalahan ni Governor Steve Chiongbian Solon.
Nagpahimangno na lamang si Police Superintendent Yago nga dili na magdala og mga backpack ang mga musulod sa Capitol Compound aron dili malisdan sa inspeksyon. Hugot usab ipatuman ang “No Smoking” ordinance maong ginadili ang pagsigarilyo.
