HINIGARAN, NEGROS OCCIDENTAL – (3rd Update) Ginhatagan sang napulo ka adlaw agud nga maka submit sang iya counter-affidavit kag ebidensya ang security guard sang isa ka beach resort sa Hinigaran nga nakatiro patay sa isa ka miembro sang Bacolod police.
Ini matapos nga ginpasakaan na sang kaso nga murder sang Hinigaran PNP ang gwardiya ang Canonoy Beach Resort nga si Joey Belenario, suspek nga nakatiro patay kay PO2 Britches Talapiero, assigned naman sa Police Station 5 sa Brgy. Granada.
Suno sa hepe sang Hinigaran PNP – Chief Inspector Jake Barila, nga ginpahanugutan sang fiscal nga maka-avail ang suspek sang iya kinamatarong sang husto nga proseso lakip na diri ang pagpatigayon sang Preliminary Investigation.
Samtang, nag-gawa naman sa resulta sang autopsy report nga tuman gid lamang ka lapit ukon close range ang distansya sa pag-tiro sang gwarda kay PO2 Talapiero.
Ang insidente natabo sadtong Enero 6 kon diin nagkadto ang pamilya sang pulis nga napatay sa amo nga beach resort para sa ila get-together, apang may nagluntad nga komosyon nga naga-involve sa iya utod nga may nakaaway nga isa pa ka customer sang beach./dyHB BACOLOD
