*Cordon, Isabela- *Dead on Arrival sa pagamutan ang isang security guard matapos na bumangga sa isang nakaparadang sasakyan sa pambansang lansangan ng Brgy. Malapat, Cordon, Isabela.
Kinilala ang nasawing biktima na si Jovito De Guzman Jr., 41 anyos, binata, at residente ng Brgy. Poblacion, Diadi, Nueva Vizcaya.
Batay sa imbestigasyon ng PNP Cordon, binabaybay ng biktima ang kahabaan ng Brgy. Malapat lulan ang minamanehong Euro Keeway RCS 125 na may plakang 02010506097 patungong South direksyon nang aksidente nitong matumbok ang nakaparadang elf truck sa right shoulder lane na minamaneho ng hindi pa nakikilalang driver.
Agad namang dinala sa ospital ang biktima matapos na magtamo ng pinsala sa iba’t-ibang bahagi ng kanyang katawan subalit binawian din ito ng buhay.
Dinala na sa himpilan ng PNP Cordon ang sangkot na motorsiklo para sa kaukulang disposisyon.
