Selebrasyon sa Kadayawan timaan sa kalinaw, paghiusa alang sa kalamboan

Davao City-Kinahanglang magpadayon ang panaghiusa alang sa kalinaw sa syudad sa Davao bisan ug unsa pay imong tribu.

Kini ang gipaambit nga mensahe ni Davao City Mayor Inday Sara Duterte Carpio sa ika-32 nga anibersaryo sa Kadayawan Festival nga saulogon sulod sa usa ka semana,human gibuksan niadtong lunes ug matapos karong domingo inubanan sa 11 ka mga tribu.

Tungod niini, giimbeta sa mayor ang si bisan kinsa, apil na niini ang mga rebelde sa pagduyog ug pagsaksi sa mga nagkadaiyang aktibidades sa selebrasyon basta kay dili maghimo og kasamok ug motuman sa mga palisiya sama sa dili pagdala og armas ug uban pa.


Malaumon si Mayor Inday Sara nga magmabungahon ug maglampuson ang Kadayawan Festival isip timailhan nga nagmalinawon na ang syudad ug mibalik na sa normal human sa nahitabong pagbusikad sa bomba sa Roxas Night Market sa nakalabay’ng tuig.

Sa pikas bahin, luyo sa mga nasinatiang suliran, pagdeklara sa Martial Law ug uban pang mga kalisdanan, ang syudad sa Davao nagpabiling malinawon ug milambo. Sumala ni Davao City 3rd District Councilor Bernard Al-ag Majority Floor Leader sa konseho ning syudad ning pagsaulog sa Kadayawan, mitaas ang turista ug mga bisita timailhan nga wala matarog ang syudad luyo sa mga dili maayong balita nga mikatag sa Mindanao.

Usa sa nakita ni Al-ag kung nganong mas angat ang Davao kung itandi sa ubang mga syudad tungod kay nagkataas ang pagsalig sa mga dabawenyo sa gobyerno. Tungod niini, dako ang pagpasalamat ni Al-ag sa mga dabawenyo sa ilang pagsalig sa mga lokal opisyal sa gobyerno busa magmalipay kita, ipadayon ang paghiusa alang sa dugang kalamboan.

Kasamang Bernard Pantallon

Facebook Comments