Mangin simple lang kag indi ikansela ang selebrasyon sang T`nalak Festival sa Hulyo subong nga tuig kundi may aktibidad lang sang pagpasalamat suno kay South Cotabato Governor Reynaldo Tamayo Jr.
Suno sa gobernador ang pipila ka pondo para sa mga aktibidad sa selebrasyon sang T`nalak Festival ang gingamit na para sa mga kinahanglanon sa pagpakig-away kontra COVID-19.
Ini matapos nga base sa ginpaggwa nga executive order no. 41 ni Koronadal City Mayor Eliordo Ogena nabalhag sa Section 3 ang pagprohibit sa tanan nga selebrasyon, parties, anniversaries and festivities kag ang mga founding anniversaries sang mga barangay, mga simbahan kag iban pa ang ginakansela base naman sa deklarasyon sang State of Public Health Emergency and Calamity nga ginapatuman sa bug-os nga pungsod tubtob sa Disyembre 31 subong nga tuig tungod sa paandam sang COVID-19.
Ginpahayag man ni Governor Tamayo nga plano niya man nga magpaggwa sang executive order nga indi na anay pahanugutan ang mga empleyado nga magtambong sa mga convention kag seminars sa gwa sang probinsya.
Ginacongratulate man sang opisyal ang mga pumuluyo sang syudad sang Koronadal nga ginsuportahan ang no movement policy sa adlaw sang Dominggo kag hingyo niya sa tanan nga katawhan sang South Cotabato nga ipadayon ang pag-isa agud nga malab-ot ang ginadamgo para sa kadalag-an batok COVID -19
