Davao City – Nagpadayon karon ang pagpanakop sa mga tinugyanan sa balaud sa mga malapason sa gipatumang health protocols sa syudad sa Davao sama sa pagsul-ob og face mask, physical o social distancing, frequent handwashing ug uban pa.
Sumala ni Davao City Police Office (DCPO) Spokesperson Captain Rosario Aguilar, sukad gipatuman ang mga guidelines o health protocols, daghan na ang ilang mga nadakpang violators sa rason nga nakalimot sa paggamit sa face mask samtang ang uban dili lamang gyud mosunod kinsa napasakaan na ug hustong kaso.
Giklaro usab ni Aguilar nga sukad giwala ang Food & Medicine (FM) Pass ug ingon man ang Curfew Hour, miubos na ang ihap sa mga malapason.
Tungod niini naglaum ang tigpamaba sa lokal nga kapulisan nga magbaton na gayud ang mga tawo og self-regulation o personal discipline aron dili na mosamot pa ang pagkuyanap sa COVID-19 sa syudad sa Davao ug nga dili na usab kinahanglang moabot sa punto nga arestohon pa gumikan lamang sa kalapasan.
RadyoMaN Bernard Pantallon
