SEMDDOC dili botohan ang kandidatong pabor sa PUV phase out

Davao City – Nagpasidaan ang Southeastern Mindanao Diversified Drivers and Operators Cooperative (SEMDDOC), dili nila botohan karong May 9, 2022 National ug Local Elections ang mga kandidato nga nagduso o pabor sa pag-phase out sa Public Utility Vehicles (PUVs).

Sa interbyu sa DXDC RMN Davao kang Maning Duran, SEMDDOC President, giawhag niini ang mga driver nga botohan kadtong makatabang sa ilang sector. Matud niya, kinahanglan usab nga mag-inbestiga ilabina sa partylist nga tinuod nga transport sector.

Gialerto usab ni Duran ang mga driver nga dili magpadikta kung kinsa ang botohan ug dili magpailad. Dili usab angay himuong basehan kung ang usa ka kandidato sikat, kundili pilion kadtong angayan.

“Botohan nato, for example kaming mga driver, operator i-phase out man mi. Didto ‘ta boto sa dili ‘ta i-phase out. Dili nato botohan ‘nang wad-an ‘tag panginabuhi kay patyon man ‘ta ana. Pamatyon ‘ta hinay-hinay ana,” sulti ni Duran.

Kahinumduman, gilusad sa Department of Transportation (DOTr) niadtong 2017 ang Public Utility Vehicle Modernization Program (PUVMP) nga nagtumong nga mamahimong system efficient and environmentally friendly ang public transportation sa nasud, diin usa sa maapektuhan niini ang mga driver ilabina kadtong nagabiyahe sa karaan nga PUVs.

RadyoMaN Kirby Manzon