Davao City – Bisan pa man og wala nahisgutan sa State of the Nation Address (SONA) ni Presidente Rodrigo Duterte apan ang pagplastar sa mga maapektuhan sa ‘jeepney phase out’ ang gipanawagan karon sa mga taga transport sektor partikular na ang Southeastern Mindanao Diversified Driver Operators Cooperative (SEMDOCC) ngadto sa Presidente.
Sa interbyu sa DXDC RMN Davao kang SEMDOCC President Maning Duran, gipanawagan niini kang Presidente Rodrigo Duterte nga hatagan og pagtagad ang maapektuhang mga indibidwal labi na ang mga operators sa hinay-hinay nga pag phase out sa mga jeepney tungod sa High Priority Bus System (HPBS).
“Unta nga kadtong maapektuhan labi na kaming maapektuhan, naa unta mi panginabuhi gihapon,” saysay ni Duran.
Gipasabot ni Duran nga wala na miduyog pa ang ilang grupo sa mga rally o lihok-protesta atol sa SONA ni Presidente Duterte kagahapong adlawa tungod kay wala usab kini kahimuan o dili malasulbad sa problema diin buot lamang sa grupo nga padayong adunay kakuhaan sa ilang panginabuhi ang nahisgutan oras nga hingpit nang wad-on ang mga jeepney sa kadalanan.
RadyoMaN Kirby Manzon
