Sa nahitabong Senate Public Committee Hearing nga gipahigayon sa Mandaya Hotel kagahapon adlawa, gipalanog niini nga ang 1987 constitution produkto sa dili maayong pagbati sa mga kanhing lideres ug sa mga tawong dunay kasuko sa administrasyon ni kanhi Presidente Ferdinand Marcos niadtong panahon nagpatigbawbaw pa ang balaod militar sa nasud.
Apan gumikan sa 1987 constitution nabiyaan na og maayo sa mga silingang nasud sa Asya ang Pilipinas diha sa hisgotanang kalamboan sa ekonomiya.
Tungod sa ekonomikanhong probisyon sa batakang balaod nga namugna niadtong 1987 iwit na kaayo ang nasud ikumpara sa ubang kanasuran sa Asya kini hatud sa ka-walay direct foreign investment misulod sa nasud nunot sa probisyon sa balaod nga 60-40 nga ownership sa negosyo.
Segun ni Senador Padilla nga kon magmalampuson kini sa pag-amenda sa economic provision mahatagan na og katungod ang mga langyaw’ng tigpatigayon nga manag-iya og hangtud 80 porsento sa iyang negosyo nga iyang ibutang sa nasod.
Apan desisyon kon pila ka porsento ang ownership unya sa mga langyaw ug unsa nga mga industriya ang puwede itugot ngadto kanila magdepende na kini sa mga magbabalaud sa kongreso ug sa senado nga maoy magbangi sa plenaryo.
Gipasabot pa sa senador nga dili na bag-o sa Pilipinas ang pag-usab sa balaod kay nahitabo na kini niadtong 1930 hangtud sa Cory administration tuig 1987.
Nagtoo ang actor nga nahimong pulitiko nga kon maaprobahan sa kongreso ug senado ang pag-utro sa probisyon sa ekonomiya mas daghan na unyang mga foreign investors ang ma-engganyo og bubo sa ilang mga capital sa negosyo nga siguradong maghatag og daghang trabaho sa mga Pilipino.
RadyoMaN Joel Viray
