Naninindigan pa rin si Senate President Chiz Escudero na hindi sila maaaring magdaos ng impeachment trial laban kay Vice President Sara Duterte ngayong naka-recess o break at walang sesyon ang Kongreso.
Sa kabila ito ng mungkahi ni Senate Minority Leader Koko Pimentel na pwedeng magsagawa ng sariling special session ang Senado para mag-convene ang impeachment court na hindi na kailangang ipatawag ng pangulo.
Sinabi ni Escudero na bago sa kanya ang opsyon na ito sabay giit na hindi maaaring mag-special session ang Senado na sila-sila lang at mayroong proseso at basehan na dapat sundin.
Ang posibilidad na magpatawag siya ng caucus ay hindi rin masasabing special session at bawal ang mag-convene bilang impeachment court habang naka-recess ang sesyon.
Binigyang-diin ni Escudero na ang susundin ng Senado ay ang Konstitusyon at ang tingin nila ay tama at hindi ang posisyon ng sinumang partisano.
