Gitahasan karon ni Cagayan de Oro Water District o COWD General Manager Bienvinido Batar Jr. ang Engineering Department sa COWD nga susihon sa sayo nga panahon ang main water pipe sa Oro Habitat, sa Sitio Calaanan, Barangay Canitoan ning syudada.
Kini aron ilang madali ang paghimog budget estimate kon pilay magasto sa COWD alang sa ilang pagtaod sa water sub out sa usa sa mga relocation site sa Barangay Canitoan ning syudad sa Cagayan de Oro.
Matud ni COWD Spokesperson Ladelle Sagrado nga gipa-inspection ni Batar ang lugar sa Oro Habitat aron ilang taoran sa Individual water Connections ang kapin sa 100 ka pamilya sa maong sendong relocation site nga naputlan sa ilang communal water connection niadtong Biyernis sa milabayng semana.
Gibutyag ni Sagrado nga giputol sa COWD ang Communal Water Connection sa Oro Habitat kay natapos na ang ilang kasabutan sa COWD ug City hall nga ilang gipirmahan niadtong 2012.
Mahinumduman nga human sa Bagyong Sendong niadtong 2011, nagsabot ang COWD ug City hall nga ang City government maoy mobayad sa water consumption sa kapin 100 ka pamilya nga nagpuyo sa Oro Habitat relocation site nga polos sendong victims ubos sa kondisyon nga ang mga relocates magpataod gayud sa ilang individual water connection gikan sa COWD.
Matud ni Sagrado nga gitahasan ni Batar ang Engineering Department sa COWD nga magtaod silag Water Sub-out sa Oro Habitat aron kini nga water facilities maoy kuhaan sa Individual water connection sa mga sendong victims sa maong dapit.
Gipasabot ni Sagrado nga gipadali ni Engineer Batar ang iyang tahas sa Engineering Department sa COWD aron makabaton na dayon sa sayong panahon sa Individual water connection ang mga sendong victims.
