Tuguegarao City, Cagayan – Pinagbabaril ng riding in tandem kaninang umaga ang isang senior citizen sa Puzon Street, San Gabriel Tuguegarao City, Cagayan.
Kinilala ang biktima na si Elmer Ricardo, animnapu’t pitong taong gulang at residente ng No. 12 E Mayon St., San Gabriel, Tuguegarao City.
Sa inisyal na imbestigasyon ng PNP Tuguegarao City, habang bumabaybay umano si Ricardo sa Puzon Street, na sakay kanyang motorsiklo ay biglang dinikitan umano ng mga suspek ang biktima na sakay rin ng motorsiklo at walang habas na pinagbabaril ng maraming beses si Ricardo.
Kaagad din umano na tumakas ang mga suspek sa hindi malamang direksyon matapos na barilin ang biktima.
Sa pagresponde ng Rescue 1111 ay nabatid na patay na ang biktima kung saan hanggang sa ngayon ay patuloy parin ang isinasagawang imbestigasyon ng PNP Tuguegarao City hinggil sa nasabing pangyayari.
