Davao City – Hugot gilimod sa usa ka senior citizen nga nangilog kini og asawa sa silingan kinsa nagwild sa iyang balay sa may Bread Village, Brgy. Buhangin pasado 12:00 sa udto kagahapon adlawa.
Atubangan sa kapulisan sa Buhangin, gihimakak ni Lolo Richard ang pasangil ni Alyas Nomer nga iyang giilog ang asawa niini nga si alyas Martina.
Nasayran nga hubog miadto sa balay sa biktima si Nomer diin misangko sa init nga panaglalis ang pag-atubang sa duha.
Mibukal matud pa sa kasuko si Nomer dihang iyang nasayran nga adunay sekreto nga relasyon ang biktimang senior citizen ug ang asawa niini butang nga wala angkuna sa biktima.
Ang mga silingan daling nagpatabang sa kapulisan aron malikayan ang dili angayang mahitabo sa duha diin ang suspek gilayon gisikop ni PO1 sa mobile #27.
Dako ang posibilidad nga dad-on sa barangay level ang reklamo sa senior citizen aron didto hatagan og katin-awan ang akusasyon ni Nomer nga giilog ang iyang asawa sa biktima.
RadyoMaN Joel Viray
