Senior nga wala ma-admit sa SPMC tungod sa kapuno namatay

374

Davao City – Patay na nga miabot sa pribadong hospital ang usa ka senior citizen kinsa wala ma-admit gilayon tungod sa kapuno sa mga pasyente sa Southern Philippines Medical Center (SPMC) kagahapong adlawa, September 14, 2021.

Unang gidala sa tambalanan ang senior nga si alias Lola Isabela, 73 anyos, biyuda, retiradong magtutudlo ug residente sa lungsod sa Padada, Davao Del Sur.


Sumala sa apo niini nga si Alyas Ken, usa ka nurse, gitakda untang ilawom sa RT-PCR test sa syudad sa Davao ang iyang apohan apan naglisod na og ginhawa si Lola Isabela, apan wala dayon maadmitar sa SPMC tungod kay paaboton pa ang resulta sa swab test ug ang kapuno sa mga pasyente sa pinakadakong pampublikong hospital sa Mindanao.

Dugang pa ni Kenneth, ilang namatikdan nga naglisud na pagginhawa ang iyang Lola hinungdan nga gisusi niini ang pulso apan dimalas kay wala na magresponde hinungdang ila na lamang kining gidala sa pribadong sa hospital sa Bajada, apan pag-abot nila sa tambalanan igo nalang gideklara sa attending physician nga patay na ang maong edaran alas 11:00 kagahapon.

Wala pa masuta kung positibo ba o dili sa coronavirus disease 2019 (COVID-19) si Lola Isabela sanglit wala pa ang resulta sa iyang swab test.

RadyoMaN Joel Viray



Facebook Comments