KABANKALAN CITY – Mga katapo sang New People’s Army (NPA) ang nagpatay kay George Garingo alyas Colasisang, 43 anyos, mangunguman sang Bayawan, Negros Oriental.
Ini naman ang nagaguwa sa imbestigasyon sang Kabankalan City Police Station paagi kay PSupt. Rhea Santos.
Si Garingo ang gintiro sang makaapat ka beses sa likod nga gintunaan sang iya gilayon nga kamatayon sang nagligad nga Miyerkukes sa Sitio Patlangka, Barangay Magballo.
Antis paman sina, nag-upod si Garingo kay Alyas Bay kag duha ka iban pa padulong sa balay ni Dominador Pelago bangod may hulamon, lima ka metros lang ang antad sa iya balay.
Suno kay Pelago, gulpi lang nga ginluthang si Garingo ni Alyas Bay kag duha ka iban pa. Si Alyas Bay ang taga-Bayawan City, Negros Oriental.
Pagkatapos nga naluthangan ang biktima, nabatian sang mga residente nga nagdeklara ang tatlo nga sila mga katapo sang NPA.
Suno sa report si Garingo ang may pending warrant of arrest sa kaso nga rape.
Sang 2014, ginwarningan na siya sang NPA nga bayaan ang Sitio Patlangka, Barangay Magballo sa rasun nga ini ang masabad sa lugar.
Nagbiya gid man ini apang sang nagligad nga tuig 2017, ini ang nagbalik matapos nagpanago sa kaso nga rape.
