Nasa halos 400-mil pesos nga balor sa shabu ang nakumpiska sa mga otoridad sa gihimong buy bust operation sa Barra, Barangay Macabalan ning syudad sa Cagayan de Oro mga alas 10:48 kagabie.
Lakip sa naaresto ang usa ka High Value Target nga si Marlon Mondelo, 34 anyos, ulitawo ug taga Zone 1, Barangay Kauswagan ug usa ka 16 anyos nga lalaki nga taga Barangay Macabalan ning syudad.
Nakuha gikan sa mga suspects ang usa ka libong buy bust money, celfon, upat ka sachet sa shabu nga dunay timbang nga 56.2 grams nga gibana-banang mobalor sa halos 400-mil pesos.
Gihimo ang operasyon pinaagi sa hiniusang pwersa sa Regional Drug Enforcement Unit ug Police Station 4 Carmen.
Samtang, detinado na karon sa Maharlika Detention Cell ang mga suspects ug mag-atubang sa kasong pagsupak sa Republic Act 9165 o Comprehensive Dangerous Drugs Act of 2002.
