VICTORIAS CITY – Nakibot ang mga katapo sang Victorias PNP sang ila gin-raid ang isa ka balay nga gin-himo nga drug den sang pila ka mga drug personalities sa area sang Sikatuna St., Brgy 3, syudad sang Victorias.
Ini matapos nga ila nadiskubrehan nga pati ang HOLY BIBLE ang gina-gamit nga talagu-an sang mga suspek sang suspected shabu.
Pasado alas 3:30 kahapon sang hapon sang nagpatigayon sang buy bust operation ang mga kapulisan sang Victorias City sa diin – ang subject amo si Joshue Ansuyon, 21 anyus, residente man sang amo nga lugar.
Nakapalagyo naman si Joshue apang na-abtan naman sang kapulisan ang amay sini nga si Jose nga amo man ang gina-tudlo nga naga-baligya sang foil sa mga naga-suyop sa ila balay.
Sa amo man nga buy bust operation, nadakpan nga yara sa sulod sang panimalay Ansuyon si Marvin Dioso, 23 anyus.
Nakuha kay Dioso, ang isa ka sachet sang suspected kag tallysheet sang STL.
Nakibot naman ang mga katapo sang Victorias PNP sang madiskubrehan ang tatlo pa ka suspected shabu nga yara mismo sa sulod sang gamay nga Holy Bible (New Testament).
Ginbuhu-an pa sang mga suspek ang sulod sang bibliya nga kon imo lantawon kaangay lang nga wala sang may gin-ipit diri.
Detained sa karon sa Victorias PNP si Dioso kag ang may ni Joshue nga si Jose Ansuyon.
