BACOLOD CITY – Ginakabig karon nga insulto para sa mga city officials sang ciudad ang ginahimo nga paggamit bilang suluyupan ukon baligyaan sang illegal nga druga ang pila ka mga buildings nga ginapanag-iyahan sang ciudad.
Ini ang reaksyon ni Vice Mayor El Cid Familiaran matapos nadakpan sining karon lang ang suspek nga nagabaligya sang druga sa merkado kag ginahimo lang sini nga front ang iya pagbaligya diri.
Suno sa bise alkalde, dapat nga tun-an sang market committee sang Sangguniang Panlungsod sang Bacolod subong man sang City Administrator kon paano nga mahatagan sang solusyon ang ini nga buluhaton agud indi masamad ang imahen sang ciudad.
Sang nakaligad, may isa ka stall sa Libertad Public Market ang natukiban man nga ginahimo man nga suluyupan sang mga negosyante nga nagapulaw ilabi na sang mga hubines.
Tags: Visayas, Bacolod, Market, shabu, war on drugs
