TALISAY CITY, NEGROS OCCIDENTAL – Nagresulta sa kamatayon sang duha ka biktima kag pagkasamad sang isa pa ang natabo nga pagpang-tiro sa isa ka bulangan sa Brgy. Concepcion, Talisay City, kahapon sang hapon.
Nakilala ang mga biktima nga nagkalamatay nga amo sanday Isagani Dalisay, 62 anyos ang edad, pumuluyo sang Had. San Isidro, Brgy. Concepcion kag Jesrel Tarrasuna, 29 anyos ang edad, sang Sitio Kataywa 2, Brgy. Concepcion, tanan sang Talisay City.
Napilasan naman si Maricel Ferrer, 35 anyos ang edad, kasado kag pumuluyo sang Brgy. Mandalagan, Bacolod City kag may isa ka iya wala nga paa.
Ang mga suspek naman amo sanday Jojo Panes kag Noel Padol, lunsay legal ang edad kag pumuluyo sang Brgy. Tangub, Bacolod City.
Suno sa imbestigasyon sang Talisay City Police Station pasado las 4 sang hapon kahapon may pabulang sa Had. Dalupihan, Brgy. Concepcion sa amo nga ciudad.
Ginpahayag nga sa wala matumod nga rason, naglalisay ang biktima nga si Jesrel kag ang suspek nga si Jojo tubtub naglab-ot sa punto nga ini sila ang nagtapungulay.
Sang ini ang nakita sang suspek nga si Noel, nagpalapit ini, nag-gabot sang iya armas nga .45 calibre kag gintiro na gid lamang si Jesrel nga naigo sa iya dughan nga gintunaan sang iya kamatayon.
Samtang, nasalabat naman ang isa pa ka biktima nga si Isagani nga naigo man sa iya idalum nga dughan.
Gindala pa sa Talisay City Health ang mga biktima apang ini sila ang gindeklarar nga dead on arrival, samtang si Maricel naman ang ginsaylo sa Corazon Locsin Montelibano Memorial Regional Hospital kag padayon nga ginabulong.
Narecover sa scene of the crime ang 3 ka empty nga cartride sang .45 calibre sang armas.
Angut sini, ginpahayag ni Talisay City Police Station, Chief of Police, P/Supt Adonis Rosales nga apisar nagpahayag sang filler ang mga suspek nga magasungka sa gihapon pasakaan ini sang separado nga mga kaso nga amo ang murder kag frustrated homicide./dyHB BACOLOD
