SHOW CAUSE ORDER PLANO IPAGAWAS SILOM ADLAWA NAN SURIGAO CITY ADMINISTRATOR BATOK SA MGA EMPLEYADO NA WAYA SA ILA TRABAHO PANAHON SA INSPEKSIYON UG MONITORING
Plano na ipagawas silom adlawa Lunes an isa ka Show Cause Order ngadto sa mga empleyado sa gobyerno sa Surigao City na waya sa ila trabaho sa dihang tagpahigayon an monitoring ug aktuwal na inspeksiyon adton milabay na semana. Ini an kusganong tagbutyag ni City Legal Officer ug Acting City Administrator Atty. Manuelito Delani.
Sumaya pa niini, kinahanglan na ipasabot sa amo na mga empleyado an rason kon uno na waya sila sa ila mga lamesa adto na mga orasa o kon nag-field tinuod ba. Tagtudlo ni Atty. Delani, an ija personal na pag-inspeksiyon ug paglibot-libot na taghimo sugod adton milabay na semana resulta sa sumbong na tagpaabot ngadto sa ija na pipila ka transaskiyon an na-pending o waya mahimo sa ngayan sa gobyerno sa siyudad gumikan kay waya an mga signatories kay human an pag-time in an kalit na mawaya sa opisina.
Dugang pa ni Atty. Delani, kinahanglan na mahunong na an amo na sitwasyon kay klaro ini na kawat sa oras sa gobyerno. Sa pag-trabaho an kinahanglan na jaon ini sa opisina ug tumanon an mga responsibilidad para wayay malangan na transaksiyon.
