Davao City – Gikondena sa pamilya sa usa ka 74 anyos nga lalaki kinsa namatay human naigo og bala sa engkwentro tali kasundaluhan ug New People’s Army kun NPA sa Sitio Kinawasan, Barangay San Isidro, Lupon, Davao Oriental niadtong adlawng Sabado, Mayo 26, 2018.
Sumala ni Lt. Col. Miguel Ramon, kumander sa 28th Infantry Battalion Philippine Army nga base sa opisyal nga pamahayag bahin sa maong insidente, gikondena sa kabanay ang kamatayon ni Vevincio Capuyan kinsa naigo og bala sa walang bahin sa lawas niini.
Gituohang naggikan ang maong bala sa pikas pundok diin matud pa sa report nahimutang ang balay sa biktima sa area tali sa posisyon sa kasundaluhan ug NPA.
Sa karon, gihatagan na og asistinsiya ang pamilya sa namatayng biktima.
Kahinumduman nga miulbo ang engkwentro tali sa duha ka grupo nga miresulta sa pagkamatay sa usa ka miyembro sa NPA, tulo ka sundalo ang samaran ug pagkapagan sa usa ka sibilyan.
RadyoMaN Renz Barbarona
