Patay ang anak sa Barangay Kapitan sa Brgy. Magkalungay, San Fernando, Bukidnon human nga nang-harass matud pa ang grupo sa New Peoples Army kon NPA.
Sa interview sa RMN Malaybalay ngadto kang Cpt. Rene Belmonte, ang Spokesperson ug Civil Military Operations Officer sa 403rd Infantry Brigade, Philippine Army, gisaysay niini nga niadtong Biyernes sa hapon samtang maghimo unta ug visitation ang mobile community support team sa militar sa peoples organization, ug pasulod na unta ang grupo sa mga kasundaluhan sa Sitio Spring, Barangay Cawayan sakop mao nga lungsod apan giharas kini sa mga NPA ug swerte na lamang nga walay naigo nga sundalo apan nadamay ang usa ka sibilyan nga naligo sa spring.
Naila ang sibilyan nga namatay nga si Jerson Blanza, 23 anyos, ulitawo ug anak sa Barangay Kapitan sa Brgy Magkalungay, San Fernando.
Gisuta ni Cpt. Belmonte nga ang grupo nga anaa sa likod sa kamatayon sa biktima ang alias Monsor sa Guerilla Front Malayag, Sub Regional Committee-2 (SRC-2), North Central Mindanao Regional Committee.
Matud ni Cpt. Belmonte nga human ang pagpangharas nagpahigayon gilayon ug pursuit operation ang kasundaluhan batok sa 30 kapin kon kulang ka mga miyembro sa NPA hinungdan nga nakabaton ug sunod-sunod nga engkwentro.
Nakarekober matud pa ang militar ug usa ka M-16 ug usa ka .45 nga calibre sa pistola.
Samtang naka-uli na usab alas 5 sa hapon kagahapon ang muabot sa 210 ka mga bakwit sa ilang tagsa-tagsa ka mga panimalay human nga na secure na ang area.
Gihatagan usab ug relief assistance sa LGU-San Fernando ang mga internally displaced person’s sa wala pa kini nakapauli sa ilang panimalay.
