RMN Laoag – Pormal a nagbalinen a ‘Basilica Minore’ ti simbaan ti Saint John the Baptist iti ili a Badoc babaen iti pammilin ni Pope Francis sadiay Roma iti daytoy nga aldaw.
Naruay dagiti debotante ken turista nga immay timmabuno iti nasao a panagrambak iti simbaan. Segun iti PNP, umabot ti nasurok kumurang 5 ribo a tattao iti nakipagpasset iti Nasantoan a Misa.
Ti simbaan ti Badoc ket maysa a Shrine ti La Virgen Milagrosa, isu’t gapuna a kinalikagoman ti Diocesis ti Laoag iti naglabas a tawen ti nangkiddaw iti rekomendasyun ti Roma a mapagbalin daytoy a ‘Basilica Minore’ wenu simbaan ti Santo Papa.
Naisayangkat iti Solemn Declaration ken Concelebrated Mass babaen kada; Apostolic Nuncio to the Philippines Most Reverend Gabrielle Geordano Caccia, D.D., CBCP President Most Reverend Romulo Valles, D.D., Archbishop-Emeritus Orlando Cardinal Quevedo, Osaka, Japan Archbishop Thomas Aquinas Manyo Cardinal Maeda, D.D. ken Laoag City Diocesan Bishop Most Reverend Renato Mayugba, D.D.
Iti sermon kalpasan ti ebanghelio, impeksa ni Most Reverend Orlando Cardinal Quevedo ti ragsakna ken kasta pay kinunana a “daytoy panagbalin a ‘Basilica Minore’ ti simbaan ti Badoc ket mangipalagip iti naespirituan a bendisyun manipud sadi langit – mangipakita iti ayat ti Dios iti sangkataohan iti Ilocandia.”
Sinuportaran daytoy naindaklan a seremonya dagiti opisyales ti gobyerno nga indauloan ni Governor Imee Marcos, Vice-Governor Angelo Marcos Barba, Senior Board Member Matthew Marcos Manotoc, Badoc Mayor Maximo Cajigal, dagiti opisyales iti 20 nga ili ken 2 a syudad iti probinsya.
Kalpasan iti misa, imado ti bilang dagiti debotante ti La Virgen Milagrosa, a dagitoy ket naggapu iti nadumaduma a passet ti pagilian a Pilipinas ken ballasiw-taaw.
Bernard Ver, RMN News
