KABANKALAN CITY – Nagbukas na ang ika-42 anyos nga Sinulog Festival sa syudad sang Kabankalan kaina.
Ginsuguran ini sang isa ka misa sa Kabankalan City Public Plaza sa diin ang misa ginpatigayon ni Rev. Fr. Raffy Bayog nga gin-updan sang pila pa gid ka mga kaparian, madre kag mga semenarista.
Ginpangunahan naman ni Mayor Isidro Zayco ang mga opisyales sang syudad sa pagtambong sa amo nga misa nga gin-updan ginatos ka mga pumuluyo nga may bitbit sang mga imahin sang Sr. Santo Niño.
Nagpatigayon sang sadsad ukon ang pagsinaot sa palibot sang syudad bitbit ang ila mga Santo Niño kag ini ginpangunahan gid mismo ni Mayor Isidro Zayco.
Ang sadsad ang isa ka sahi sang pagpasalamat sang mga deboto sang Santo Niño sa grasya nga ila nabaton sa bilog nga tuig.
Pagkatapos sang sadsad dire na kag pormal nga ginbuksan ang ika-42 nga Sinulog Festival kag ginsundan ini sang Fireworks Display.
Ini amo ang panugod sang syam kaadlaw nga kahiwatan kag ang highlight sini patigayunon sa Enero 21, 2018 sa diin makit-an ang sambuwa sang nanuhay tuhay nga tribu gikan sa mga kabarangayan sang syudad. / Grace Supe photo
