Timmabuno dagiti ubbing manipud iti nadumaduma nga Child Development Centers iti Ciudad ti Laoag iti pabuya nga naangay idi kalman, Pebrero 20, 2018 oras ti alas dos ti malem.
Naruay a pabuya dagiti naimatangan kas iti mahika ken acrobatics nga impaay dagiti clowns ken eksperto idiay Multi-purpose Hall iti ciudad.
Mangngegan dagiti ikkis ken palakpak dagiti ubbing, nagannak, kasta met dagiti mangisursuro, empleyado iti City Hall, ken bisbisita nga naliwliwa iti makaay-ayo launay nga pabuya.
Nagkaadu nga panagsirko-sirko ken balancing acts ti nangpabilib kadagiti agbuybuya kangrunaan dagiti ubbing nga saan a mailadawan iti ragsak da.
Daytoy a gundaway nga insagut iti ciudad kadakuada kas paset ti selebrasyon ti Pamulinawen Festival ket padas nga agtalinaed iti puso ken panunot.
Agbalin a karit tapnon mapadur-as dagiti abilidad ken talugading nga mabalin to met nga iparabur da iti masangwanan nga al-aldaw.
Ni City Administrator, Mr. Jamie Fariñas iti nangipaay ti panglukat a mensahe kas panangsarabo kadagiti dimmar-ay.
– DJ Melo Dee
