NEGROS OCCIDENTAL – Napilian bilang Sangguniang Kabataan Federation president sang Negros Occidental ang taga-San Carlos City sa election nga ginpatigayon kahapon sang hapon sa isa ka hotel sa ciudad sang Bacolod.
Si Pocholo Yuvienco, SK chairman sang Brgy. 2, San Carlos City ang nag-angkon sang 16 votes.
Nahibaluan nga si Yuvienco ang anak sang barangay kagawad kag isa ka negosyante sa San Carlos, nag-graduate sang Business Administration sa San Beda College sa Manila.
Suno sa iya nga priority sini nga pamatud-an nga maga function ang SK bilang bag-o nga henerasyon sang Sangguniang Kabataan lakip na ang pag-establish sang provincial youth development council nga magatutok sa problema sang illegal drugs kag teenage pregnancy.
Napilian naman bilang Vice-President si Anette Gatuslao sang Himamaylan, Secretary si Ma Delmar sang Silay City.
Ang representante naman sang Kabankalan City nga si Jeorgelyn Largado ang ginboto bilang treasurer.
Si Vicxee Tejones naman sang Escalante City ang Auditor, Public Relations Officer si Novey Molejon sang Sipalay kag Sgt.-at Arms si Khemer Mamon sang banwa sang San Enrique.
Siya man ang magapungko bilang ex-officio member sang SK sa Provincial Board.
Ang pagpili sang mga SK Federation officials sang probinsya ang gintambungan nanday Provincial DILG Director Carmelo Orbista, Provincial Comelec Supervisor Atty. Jessie Suarez, Provincial Development Council Head Marlin Sanogal, Atty. Makie Ascalon sang Sangguniang Panlalawigan.
Ang inducting officer naman amo si Punong Barangay Aristotle Tuvilla sang Brgy. Zone 10, Talisay City./Clark Despi photo
