Nakahanda na siya suno kay Alyssa Marie Fale, Sangguniang Kabataan President sa probinsya sang South Cotabato sa pormal sini nga pagpungko bilang ex-officio member sang Sangguniang Panlalawigan matapos nga siya ang ginpili nga mangin tingog sang mga kabataan sa bug-os nga probinsya.
May-angot sini, bilang preparasyon sa iya natalana nga pagpungko sa Sangguniang Panlalawigan nagbisita ini kag nag-obserbar kahapon nga adlaw sa ginpatigayon nga regular session sang mga katapo sang Sangguniang Panlalawigan agud suno pa may ihibalo man siya sa mangin papel sini bilang miyembro sang SP.
Hulyo 2 subong nga tuig suno sa iya ang una nga adlaw nga pagtambong niya sa regular session sang Sangguniang Panlalawigan.
Samtang sa pamangkot kon bala handa siya sa panindugan sa mga makontrobersyal nga isyu kapareho sang proposed coal mining project sa Barangay Ned, Lake Sebu nga pending pa sa SP suno sa iya ini ang iya pa nga tun-an kag preparahan man.
Ini tungod posible indi pa madesisyunan sang mga katapo sang SP ang nasambit nga isyu bag-o ini magpungko bilang ex-officio member matapos nga kahapon liwat nga ginpadiffer sang Committee on Environment ang deliberasyon sa proposed coal mining project.
