Sarangani Province–Patapos na ang tuig apan nagpadayon pa ang Provincial Government sa Sarangani sa pag-alokar og pondo para sa mga dungag-proyekto pinaagi sa Sulong Sarangani flagship program ni Governor Steve Chiongbian Solon kauban sila Senador Manny og Congressman Ruel Pacquiao, Vice Governor Elmer De Peralta, mga board member, og mga mayores.
Nikabat sa P106 Milyon ka pesos ang gi-aprobahan sa Sangguniang Panlalawigan niaging adlaw nga Martes atol sa regular sesyon lunlon tanan og mga infrastructure projects.
Segun ni Board Member Bobot Martinez, ang chairman sa komitiba sa finance, og maoy nagduso sa appropriation ordinance, anaa sa P133 Milyon ka pesos ang ilang kinatibuk-ang gi-aprobahan nga maoy unod sa Supplemental Budget Number 3, diin ang P106 Milyon niini ang buhos tanan sa imprastraktura, samtang ang nahabiling P27 Milyon ka pesos ang gitagana para sa mga dungag-programa og aktibidad.
Adunay P700 Thousand ka pesos ang gigahin para sa AICS *(ah-iks)* kon Aid to Individual in Crisis Situation, wala pay apil ang muabutay nga One Milyon ka pesos (P1M) gikan sa D.B.M. kon Department of Budget and Management, matabangan ang mga kabus nga lumulupyo nga matagaan og ayudang pinansyal inig ma-ospital og pagpalubong sa nitaliwan nga mga kabanay.
Nag-pondo usab og P3.5 Milyon ka pesos para sa pagkaon sa mga piniriso sa Sarangani Provincial Jail tungod kay dili tiaw nga nialsa ang gidaghanon sa mga nabilanggo tungod sa kampanya ni Pangulong Rodrigo Duterte nga batukan ang ilegal nga druga. Ang pagpadagan sa provincial jail ang ilalum pa kini sa mandato sa provincial government, maong apil kini nga gitutukan ni Governor Solon. Gani, bag-uhay lang gisugdan ang pagpatukod og dungag nga mga selda. (News From: Governor’s Office of Sarangani Province)
