Davao City – Sobra sa usa ka kilo nga marijuana ang nasikop sa kapulisan
atol sa gilusad nga buy bust operation sa San Pedro PNP alas-3 sa kaadlawon
sa Aquino St. Purok 44 Phase 2 SIR New Matina ning syudad.
Sa rekord sa kapulisan, adunay gipahigayon nga buy bust operation ang
kapulisan sa kasikbit nga lugar ug napugos ang dinakpan og tug-an kun asa
kini tigkuha og iligal nga droga ug didto naila ang suspek nga mao si Ariel
Guttierez Duran alyas Joriel, 24 anyos nga taga-Km. 4 Bajada ning dakbayan.
Matod pa ang suspek usa ka purok leader sa Barangay 19-B ug naga arkila
lamang sa usa ka boarding house sa nasangpit nga lugar.
Sa pagresponde sa kapolisan nahatagan pa sila og usa ka plastic sachet nga
dunay sulod nga dahon sa marijuana bugti sa kantidad nga 500 pesos apan sa
pag sulod ngadto sa gipondohan sa suspek dali kining misibat.
Nasayran nga gitagoan ilawom sa lababo sulod sa iyang gipuy-an ang tulo ka
bundle sa marijuana nga gisulod sa usa ka dakong paper bag nga adunay
street value nga mokantidad og kapin 100,000 pesos.
Sa pagkakaron, pasakahan una og kaso ang suspek ngadto sa korte aron
mapagawas ang warrant of arrest niini sa kasong paglapas sa RA 9165 kun
Comprehensive Dangerous Drugs Act of 2002.
RadyoMaN Paul Canono
