BACOLOD CITY – Ginaduso karon ni Bacolod City Councilor Ricardo “Cano” Tan nga dapat mangin agresibo ang pamaagi nga makita sang Executive Department para masulbar ang sunod sunod nga hold-up kag kinawatay sa ciudad sang Bacolod.
Suno kay Coun. Tan, chairman sang Committee on Police, Security and Jail Management nga dapat ipasiguro sang Office of the Mayor nga ginahimo sang police ang ila responsibilidad sa atubang sang madamo na karon nga kaso sang robbery kag hold-up sa ciudad.
Ginaduso ni Tan nga panahon na i-activate ang mga tawo sa barangay bilang force multipliers.
Samtang, nagapati naman si Councilor Caesar Distrito nga indi maayo para kabilugan nga imahe sang syudad sang Bacolod ang kampanya sang pila ka grupo sa social media sa diin nabutang diri ang mga tinaga nga: “Bacolod is not safe anymore” #BacolodIsNotSafeAnymore.
Suno kay Coun. Distrito apisar makabig nga alarming ang mga kaso sang hold-up kag pagpangawat, indi naman maka-paayo ang amo nga kampanya sa social media sa diin maka-tuga lang ini sang kahadlok.
Ginpaathag ni Distrito nga dapat proteheraan man sang mga pumuluyo ang imahe sang Bacolod ilabi na sa naga-hilapit nga Masskara Festival.
Sa pihak nga bahin, gin kontra ni Bacolod City Police Director Pssupt Jack Wanky ang ginapalapta nga delikado ukon indi na safe and syudad sang Bacolod.
Ini ang reaksyon ni Wanky matapus naga lapta sa social network nga facebook nga indi na safe ang Bacolod bangud sa mga kaso sang hold-up, carnapping kag kinawatay.
Suno kay Wanky ang pulis lang ang may opisyal nga maka declare kun ang isa ka lugar ang safe ukon indi./dyHB BACOLOD
