Yara na sa estable nga kondisyon ang duha ka soldado nga napilasan sa engkwentro sa tunga sang tropa sang gobyerno -79th Infantry Battalion kag katapo sang rebelde nga New People’s Army nga naglawig sang kapin sa 30 minutos sa Barangay 11 (Gawahon) syudad sang Victorias, mga alas-8:30 kahapon sang aga, Abril 24, 2020.
Ini suno kay 303rd IB commander Col. Inocencio Pasaporte.
Ang mga nagkalapilasan nga soldado nga sanday Corporal Louie Maghanoy kag Corporal Ramy Chiefe, ang yari karun sa isa ka hospital sa ciudad sang Bacolod.
Una na nga ginpahayag kahapon ni Pasaporte nga nagapatigayon sang information dissemination angut sa COVID-19 ang mga katapo sang Scout Platoon sang Philippine Army sa pagpanguna ni 1Lt. Ricky Bartolome upod sang PNP-SAF ini sila ang naka-enkwentro sang indi pa matumod nga kadamuon sang rebelde.
Bangud sini, gilayon nga ginhatagan sang direktiba ang 79th Scout Platoon nga ginapamunuan naman ni 2Lt. Maverick Acierda nga magpatigayon sang blocking position.
Ginpahayag nga wala sang casualty sa bahin sang tropa sang gobierno samtang ginapatihan nga may mga napatay sa bahin sang rebelde.
Natigayon nga ma-recover sa encounter site ang 2 ka improvised explosive device (IED), mga bala sang AK47 kag M16, mga subersibo nga dokumento kag iban pa nga mga kagamitan.
Ini ang ikaduha na nga engkwentro sa sini nga semana sa tunga sang tropa sang gobyerno kag NPA sa probinsya sang Negros Occidental matapos sa natabo sang Lunes nga engkwentro nga ginkapatay sang tatlo (3) ka soldado sa ciudad sang Himamaylan.
