NEGROS OCCIDENTAL – Duha na naman ka soltero, isa diri ang menor de edad ang nabiktima sang pagpang-buno kag paglampos sang botilya bangud sang hinubog nga istorya kagab-i sa ciudad sang Bacolod kag Victorias.
Sa Bacolod, ang biktima isa ka 17-anyos nga bata nga lalaki, residente sang Brgy. Taculing, Bacolod City.
Ang insidente natabo pasado las 9 kagab-i sa 7th Road, Brgy. Taculing kon diin suno sa utod sang biktima nga ginlampusan sang buka nga botilya sang ilimnon ang iya magulang kag naigo sa ulo.
Samtang sa Victorias City naman, nabiktima sang pagbuno gamit ang icepick ang biktima nga si Jenmar Abada, 26 anyos, residente sang Brgy. 18-A, Victorias City.
Suno sa biktima nga may mg alas 10:20 kagab-i sa ila man lamang lugar, naga inom-inom sila upod sang suspek sang natabo ang pag-linalisay tubtub nga ini ang ginbuno kag naigo sa iya liog, guya kag likod.
Sa karon ang duha lunsay ginabulong sa Corazon Locsin Montelibano Memorial Regional Hospital./dyHB BACOLOD
