South Cotabato Division Office magabulig sa pag-istablisar sang Temporary Learning Spaces sa napili nga adopted school sa North Cotabato.

Magabulig ang South Cotabato Division Office sa pag-istablisar sang Temporary Learning Spaces sa mga eskwelahan sa North Cotabato nga mas apektado sang magkasunod nga mabaskog nga linog sang nagligad nga bulan base naman sa kamanduan ni Department of Education Regional Director 12 Dr. Allan Farnazo.
May-angot sini, suno kay South Cotabato Schools Division Office Education Program Specialist, Social Mobilization and Network head Tyron Jann Villanueva ang gin-assign sa division nga mangin adopted school ang Makilala Central Elementary School nga yara sa 1,537 ka mga learners kag 53 ka mga manunudlo ang apektado.
Yara naman sa 47 ka mga classrooms sang Makilala Central Elementary School ang gindeklarar nga indi na safe pa nga i-occupy amo nga kinahanglan ang pagtukod sang temporary learning spaces agud nga makaresume na sa Lunes nga adlaw ang klase sang mga kabataan sa nasambit nga lugar.
Kaangot sini ginahingyo naman sang pamunuan sang division office sa mga school heads, teachers, partners and stakeholders partikular na sa mga nagahatag sang donasyon nga hatagan man sang prayoridad ang pagbulig sa pagtukod sang Temporary Learning Spaces, school supplies and medicines.
Ginsiguro man ni Sir Villanueva nga sa pihak sang pagbulig nila sa mga apektado nga eskwelahan sa North Cotabato wala man nagapabaya ang division sa paghatag sang intervention sa mga eskwelahan dire sa probinsya nga apektado man sang magkasunod nga linog.