Nagalaum ang Provincial Social Welfare and Development Office ukon PSWDO South Cotabato nga kuntani may legislator sa probinsya nga magduso ukon NGO man nga magpatukod sang “home for the aged” sa probinsya.
Suno kay PSWD OIC Haidee Agustin ini agud may mabutangan sang mga tigulang nga gin-abandona ukon ginpabay-an na sang ila himata kag pamilya.
Ini matapos suno kay Agustin nga problema nila kon kaisa ang paglocate sa mga himata sang mga katigulangan kag pagpangita sang lugar nga butangan sa mga ini.
Nahibaluan nga sa subong, ang mga ginpabay-an nga mga tigulang ang ginadala sang PSWDO sa “home for the aged” sa Gensan ukon sa Digos City.
Samtang dapat nga tun-an sang maayo ang ginaduso nga pagtukod sang “Home for the Aged” sa probinsya agud nga indi maabuso sang mga kabataan ukon himata man sang mga katingulangan.
Ini tungod sa posibilidad nga kon may home for the aged isalig na lang sang mga kabataan sini sa gobyerno ang pagsagod sa ila mga katigulangan.
Suno kay South Cotabato Federation Senior Citizens Association (SOCOFESCA) President Felipe Malibago ini tungod una bes obligasyon sang pamilya ang pagsagod sa mga katigulangan.
Ginhatagan pa punto ni Malibago nga sang bata pa ginalagas sang mga ginikanan ang mga bata agud nga pakan-on kag paliguan amo nga sa panahon nga indi na kairo ang mga ginikanan dapat nga amomahon man sang mga kabataan.
