Gin-extend pa tubtob sa Hulyo 15 subong nga tuig ang modified general community quarantine ukon MGCQ sa South Cotabato bilang pagsunod naman sa kamanduan sang national government, suno kay Governor Reynaldo Tamayo Jr.
Sa Executive no. 36 nga ginpaggwa kahapon nga adlaw ni Governor Tamayo ipatuman sa gihapon ang 50 percent capacity sang mga establisemento, mandatory ang physical distancing, pagsuksok sang face mask , paghugas sang kamot, alcholohol ukon sanitizer kag temperature checking. Ginapasugtan man ang dine- in sa mga restaurant, mall operation nakabase sa direktiba sang Department of Trade and Industry ukon DTI.
Ginahangkat naman ang mga menor de edad kag senior citizen nga kon wala man lang sang importante nga lakat ang magpamuyong na lang sa balay.
Samtang umpisa kahapon nga adlaw Hulyo 1 ginbuksan naman ang mga border areas sang probinsya tungod wala naman suno sa gobernador sang local transmission sang COVID 19 sa South Cotabato kag kaiping nga probinsya.
Dugang niya pa nga ang mga locally stranded individual kag returning OFW`s lang man ang nagapositibo nga hugot naman nga ginapatuman ang health protocol sa mga ini.
May-angot sini, tungod bukas na ang borders sang probinsya ginahangkat sini ang mga pumuluyo nga kon may kilala nga halin sa iban nga rehiyon ilabi na sa may local transmission ang ipalab-ot gilayon sa mga health authorities sa lugar.
Advice niya naman nga permanente nga dal-on ang mga SCCTS card sa mga magsulod kag gwa sa probinsya agud nga indi mabudlay ang contact tracing sa tion nga may magpositibo.
Paklaro naman ni Governor Tamayo nga tungod sa mga nagpauli nga mga LSI kag ROF sa probinsya nga nagpositibo sa virus ang rason kon ngaa nadala ang South Cotabato kag Sultan Kudarat sa emerging COVID-19 hotspots.
