May-yara sa subong sang lima ka mga person under monitoring ukon PUM sa 2019 Novel Coronavirus ang South Cotabato base sa datos sang Provincial Epidemiology Surveillance Unit sang Integrated Provincial Health Office.
Apang suno kay Provincial Health Officer Dr. Rogelio Aturdido Jr., ang mga ini ang nakaquaratine na sa ila tagsa ka mga puluy-an kag adlaw-adlaw nga ginamonitor ang ila nga sitwasyon nga tubtob subong negatibo sa anuman nga sintomas sa nasambit nga balatian amo nga wala sang dapat nga kabalak-an suno pa ang mga pumuluyo sa probinsya.
Apat naman sa mga ini ang Overseas Filipino Workers kag ang isa ang nagbakasyon nga halin sa mga pungsod sang China, Malaysia kag Hongkong nga may kumpirmado nga kaso sang nCov.
Nag-abot suno pa sa pungsod ang lima sang Enero 31 tubtob Pebrero 2 subong nga tuig nga natrace naman sang Provincial Epidemiology and Sureveillance Unit sang IPHO kag pipila na lang ka adlaw matapos na ang katorse ka adlaw nga pagpaidalom sa quarantine.
Paklaro naman ni Dr. Aturdido nga ang mga PUM ang may history sang travel sa China kag sa iban pa nga pungsod nga may kaso sang nCov nga wala sang sintomas sang nasambit nga balatian, apang kinahanglan nga i-quaratine sila sa sulod sang 14 ka adlaw nga amo man ang incubation period sang nasambit nga balatian.
Samtang ginaawhag man ni Dr. Aturdido ang mga pumuluyo nga kon may himata nga nag-abot kag magpauli pa lang dire probinsya nga kon mahimo ipabalo gid sa mga barangay, municipal kag provincial health office.
