*General Santos City— Gimando na ni Police Senior Superintendent Romeo Ruel Berango, OIC City Director sa GenSan City Police Office ang pagmugna ug Special Investigation Team nga maoy mututok sa mga pagpamusil-patay sa dakbayan.*
*Sumala niya nga nag-unang trabaho sa kapulisan mao gyud ang pag-prevent ug paghatag ug solusyon sa krimen, rason nga kung dili kini ma-prebentahan, kinahanglan gyud nga kini hatagan ug solusyon.*
*Gitahasan man usab niini si Police Chief Inspector Joel Fumukao aron sa pagmugna sa maong special team nga pangunahan sa mga police station partikular na ang mga hepe sa police station 1, police station 3 ug police station 4 kung asa adunay naitalang pagpamusil-patay.*
*Dugang pa niya nga hugot ang iyahang direktiba sa mga Chief of Police nga kinahanglan gyud nga sulbaron ang maong mga kaso gumikan kung dili nila kini mahatagan ug solusyon, dili siya magduha-duhang i-relib sila sa ilahang pwesto.*
*Tumong niini aron nga mas madasig ang kapulisan sa ilahang trabaho hilabi na sa hisgutang crime prevention.*
*Saysay pa niya nga padayon pa ang ginahimong imbestigasyon sa maong mga kaso kung asa gipaniguro niya nga wala nagapasagad ang kapulisan sa pagbantay sa siguridad.*
*Samtang, giangkon ni Col. Berango nga dili gyud malikayan nga adunay mahitabong krimen sa unsa mang syudad hilabi na ang mga dagkong syudad sama sa dakbayan sa GenSan apan ginapaningkamutan matud pa nila sa kapulisan nga makahimo ug maayong operational plan aron nga masulusyunan ang mga krimen sa syudad.*
